ALBERTO NEGRIN
Naschet in Casablanca in su 1940 dae babbu e mamma de orìgine ebràica chi aiant lassadu s’Itàlia cando bi fiat su fascismu. Acabada sa gherra, pustis sa maturidade clàssica, faghet sos istùdios de filosofia in S’Universidade de Milano. Amantiosu de fotografia, collàborat in custa manera pro paritzas publicatzione (intre de custas Storia Illustrata, Panorama, L’Espresso, L’Europeo). In su 1962 intrat in su Piccolo Teatro, comente assistente a sa regia de Giorgio Strehler, Orazio Costa e Virginio Puecher. Dae su 1965 a oe, at firmadu paritzas regias de su Piccolo e, in su 1969, semper pro su Piccolo, faghet su film-inchesta Operai. Dae su 1968 si dèdicat fintzas a su cìnema e a sa TV, faghende inchestas, iscenegiados e fiction leadas dae sas òperas literàrias o de genia biogràfica. Tra sos primos traballos suos at s’iscenegiadu pro pitzocos Il gatto con gli stivali (1969), Racket, un’inchesta de su 1972 subra sa buscada de manobràntzia clandestina dae banda de sa màfia, Il picciotto (1973), La promessa, dae su testu omònimu de Friedrich Dürrenmatt. In su 1985 faghet sa sèrie Io e il Duce, e in su 1987 Il segreto del Sahara, ispiradu a sos romanzos de Emilio Salgari. In su 1990 girat una co-produtzione ìtalu-statunitense: L’Achille Lauro – Viaggio nel terrore cun Burt Lancaster. In sos annos noranta e duamìgia sighit cun sos traballos intensos pro sa televisione intre de custos ammentamus Una questione privata (1991), Perlasca – Un eroe italiano (2001), Il cuore nel pozzo (2005), Gino Bartali – L’intramontabile (2006), L’ultimo dei Corleonesi (2007), Pane e libertà (2009) subra su sindacalista Giuseppe Di Vittorio, e Rita Levi Montalcini (2020). In prus est de importu fintzas sa produtzione sua documentarìstica chi tocant sos temas sotziales crispos de sa marginalidade, de su terrorismu, de su mercadu sessuale, de sa presone e àteros: Commando ultrà curva sud (1977), Colonna BR Walter Alasia (1978), Franceschini e le BR (1988), Amore dietro le sbarre (1990), Barboni (1992), Racket usura tangenti (1992), Cicciolina – Moana – Ramba (1992), Renato Curcio (1993), Processo Priebke (1996), Mercanti di donne (1999), Casting (2003).
SIMONETTA COLUMBU
Simonetta Columbu naschet in su mese de austu 1993 in Casteddu. Creschet in s’ambiente de s’arte e de sa cultura. Babbu suo est su regista sardu Giovanni Columbu, su mannoi Michele fiat istadu deputadu europeu e italianu e autore de paritzos libros, sa mannai Simonetta Giacobbe fiat iscritora e tzia sua Maria Giacobbe est una de sas iscritoras sarda de gabbale. In Casteddu nch’abarrat fintzas a sos 18 annos. Leat sa maturidade clàssica e deretu in edade majore si nche andat in Inghilterra ue perfetzionat s’inglesu suo. Pustis tràmudat a Roma ue istùdiat recitatzione pro 4 annos in su Duse International. A pustis de s’iscola cumentzat a traballare. Su primu traballu mannu est Surbiles, docu-film giradu dae su babbu in ue est protagonista, chi lu presentant in su festival de Locarno. Sighit posca su ruolu de co-protagonista in su film Io sono Tempesta de Daniele Luchetti, recitende paris cun Elio Germano e Marco Giallini. Leat parte a pustis a sa fiction bonassortada Fiction Che Dio Ci Aiuti 5 e 6 in su ruolu de co-protagonista a costados de Elena Sofia Ricci. Essit, acabende su 2021, un’àteru film in ue tenet una parte, chi s’intìtulat Mollo tutto e apro un chiringuito, cummèdia prodota e distribuida dae Medusa Film.
LARA FREMDER
Lara Fremder est nàschida in Milano ue istat e traballat. Collàborat cun su Studio Azzurro, realidade internatzionale de chirca artìstica chi nche iscriet tra sos àteros sos sugetos e sas iscenegiaduras de sos film L’Osservatorio Nucleare del signor Nanof, Il Mnemonista, sas drammaturgias de sas òperas vìdeo Camera Astratta, Kepler’s Traum, Acqua, Fuoco e Terra, omàgiu a Tarkovskij, e sos testos de s’òpera museale Testimoni dei Testimoni. At iscritu sos sugetos e sas iscenegiaduras de film presentados in cuncursu in Locarno, Cannes, Venètzia. Intre custos, diretos dae Marco Bechis Alambrado, Garage Olimpo, Hijos, Birdwatchers – la terra degli uomini rossi. Intre de sos àteros film iscritos, Visos de Giovanni Columbu, Iqbal, film animatzione diretu dae Michel Fuzzellier e Babak Pajami binchidore de paritzos festival internatzionales, sos documentàrios Nacion Mapuche de Fausta Quattrini, documentàriu mègius in su de 25 Torino Film Festival, Il viaggio di Laura de Matteo Born, Monsieur Pigeon de Antonio Prata, Chi mi ha incontrato non mi ha visto de Bruno Bigoni. At iscritu e diretu che regista Blue Sofa, binchidore de su Grand Prix in su Festival International du Court Mètrage de Clermont Ferrand e su curtzumetràgiu Santa Fe. In produtzione b’at su film de animatzione Un Viaggio a Teulada de Nicola Contini, Gerusalemme città invisibile de Lara Fremder, Rocco – Boxing with my father de Teresa Ierapoli.
SAMUEL JULIEN
A pustis de una carriera comente insinnante bilìngue in sas classes francu-brètones, Samuel Julien (nàschidu in su 1974) est divènnidu su diretore de s’assòtziu Dizale, cun sa sea in Quimper. Custa istrutura, chi at afestadu dae pagu tempus sos binti annos suos de vida, est unu intre de sos atores de su setore audiovisivu in limba brètone prus de importu, ispecializadu in dopiàgiu e sutatitulatzione. In prus Dizale leat parte a paritzas produtziones e co-produtziones de òperas audiovisivas e radiofònicas e fintzas a sa produtzione de audioguìdas pro museos e istitutziones pùblicas. Totu sas òperas prodotas sunt pro su prus trasmìtidas in canales televisivos diferentes in Bretagna. Dizale assegurat fintzas una distributzione a sas produtziones suas, siat pro mèdiu de projetziones cinematogràficas e prus de reghente peri sa fundatzione de BreizhVOD, una casta de “Netflix” in limba brètone. Dizale leat parte in manera ativa a s’isvilupu de su setore audiovisivu in limba galo, s’àtera limba de sa Bretagna, e at isvilupadu una relata forte cun istruturas sorrestas in limba corsa e ocitana, prus a notu pro su chi pertocat su dopiàgiu e sa radiodifusione. A disora, Samuel iscriet artìculos in limba brètone pro sa revista Bremañ e fùrriat òperas cuntemporàneas dae sa limba islovena a su frantzesu.
MIRIAM MAUTI
Miriam Mauti, nàschida a Roma, dae prus de 30 annos est una boghe reconnota de sa radiofonia de sa Capitale, ue at cumentzadu che cronista in Radio Città Futura, emitente istòrica. Dae s’acabu de sos annos ’80, su primu atòbiu cun sa Rai, pro sa cale at ghiadu pro 25 annos su cuotidianu de cìnema de RadioTre Hollywood Party. At contadu su cìnema che inviada a sos Festival cinematogràficos internatzionales prus de importu, dae Venètzia a Cannes, dae Toronto a Marrakesh, cun intervistas e reportage. In su 2016, pro su Festival Moviemov, at presentadu unos cantos tìtulos de su cìnema italianu a su pùblicu de sa Cineteca de Manila, in sas Filipinas. Dae su 2017 a su 2019, s’est acarada cun sa TV, contende sas boghes e sos personàgios de sa cultura de s’ìsula – pro sa TGR Sardegna – torrende posca a sa Radio, passione sua manna paris cun sos biàgios. Oe est cabuservìtziu de sa redatzione Ispetàculos e Cultura de su Giornale Radio Rai.
NADIA TREVISAN
Nadia Trevisan est presidente e co-fundadora cun Alberto Fasulo de Nefertiti Film. S’at fatu un’esperièntzia manna in sa co-produtzione internatzionale e isvilupadu una retza de relatas cun sas istitutziones regionales, natzionales e subranatzionales de su setore audiovisivu ma fintzas cun produtores, distribudores e sales agent chi arribant dae totu Europa. At prodotu Piccolo Corpo di Laura Samani, in cuncursu in sa Semaine de la Critique Cannes 2021, Brotherhood, documentàriu de Francesco Montagner, binchidore de su Pardo d’Oro Cineasti de su Presente in su de 74° Locarno Film Festival 2021, Menocchio (71° Locarno Film Festival – Cuncursu Internatzionale), Genitori (68° Locarno FF- Foras Cuncursu), TIR (Marc’Aurelio d’Oro a sa de VIII editziones de su Festival Internatzionale de su Cìnema de Roma) totus de su regista Alberto Fasulo; History of Love (53°Karlovy Vary International Film Festival) de sa regista islovena Sonja Prosenc, film seberadu pro rapresentare s’Islovenia in sos Prèmios Oscar 2020. Como chi est como, Nadia est isvilupende La Corda su film nou de Alberto Fasulo e La Lingua Salvata, documentàriu, cun sa regia de Francesca Pirani. At leadu parte a Producers Network – Le Marché du Film Cannes, faghet parte de EAVE – European Audiovisual Entrepreneurs, de EFA – European Film Academy e de EWA ‐ European Women’s Audiovisual Network. A Nadia l’ant seberada pro leare parte a Cannes 2019 che rapresentante pro s’Itàlia in Producers on the Move.
MIRJAM VELLINGA
Mirjam Vellinga (1972), at istudiadu limba e literadura frisone in s’Universidade de Groningen (RuG). Traballat anco Afûk dae su 1998 e est sa ghia de marketing e manager de sa parte promotzione linguìstica anco Afûk. In su 2007 at inghitzadu e isvilupadu sa campagna Praat mar Frysk, chi punnat a sa promotzione linguìstica globale pro sa limba frisone chi at tentu reconnoschimentos internatzionales mescamente pro sas campagnas fortes in sos social media. Est project leader de progetos chi pertocant su frisone in s’assistèntzia sanitària, su frisone in s’economia aziendale e su team chi frunit consulèntzia a sos servìtzios pùblicos de Fryslân in matèria de polìtica linguìstica. Est istada project manager pro Lân fan Taal, su programma linguìsticu pro EcoC Leeuwarden-Fryslân 2018. Tenet una retze intenatzionale ampra in su mundu de sa cultura, de sos media e de s’istrutzione chi girant a fùrriu desas limbas co-ufitziales, chi sunt isparessende, indìgenas, regionales e minoritàrias. Est membru de su comitadu diretivu de ELEN (European Language Equality Network) e faghet parte de su NPLD (Network to promote Linguïstic Diversity).
