Festival

Su Babel Film Festival est su primu cuncursu tzinematogràficu internatzionale fatu solu pro sas produtziones tzinematogràficas chi cherent abaidare e contare sas minorias, mescamente sas minorias linguìsticas. Est una novidade de importu mannu in su cuntestu tzinematogràficu in ue sas produtziones sighint a faeddare solu limbas omologadas e universales, chi cuant, in una calchi manera, s’universu de s’espressada umana. Sa limba de minoria est una limba chi bivet de sa diversidade sua e de sa richesa chi torrat a chie la faeddat. Non solu in sa vida chi l’est garantida dae chie la faeddat, ma fintzas dae sa vida chi sas artes poèticas li torrant a donare onni borta. Su tzìnema, chi in su passadu no at valorizadu mai sas faeddadas locales, si non in relatzione a sa capatzidade sua de fàghere sa caricadura de una manera de bìvere istratificada (in sensu sotziològicu e antropològicu), dae una pariga de annos at invetzes torradu a bìvere in s’atòbiu cun sas faeddadas locales, cun sas limbas e sos dialetos chi sighint a bìvere in àreas linguìsticas, bortas meda perifèricas, de totu su mundu. Sas comunidades ant torradu a iscobèrrere s’identidade issoro fintzas gràtzias a una limba chi in su passadu caraterizaiat s’esistèntzia de cussu grupu e chi in su tempus de su progressu, bantidu de sas innovatziones tecnològicas, at arriscadu de si pèrdere. Fintzas gràtzias a sas limbas sighidas a faeddare in famìlia, cun sos amigos e in sa comunidade, sa crisi de sas bisiones universales e totales at fatu torrare medas comunidades a iscobèrrere su sensu de apartenèntzia.

LIn custos ùrtimos annos sa Sardigna at fatu sèberos de importu mannu pro sa tutela de su patrimòniu linguìsticu de sas comunidades de s’ìsula, reconnoschende – mancari tenende in contu sas diferèntzias intre de sas variedades linguìsticas suas – una unidade in sa tutela, in su recùperu e in sa valorizatzione de sas limbas. Su Babel Film Festival naschet fintzas dae su reconnoschimentu de una tzentralidade chi no est solu geogràfica, ma fintzas dinàmica e culturale de su destinu de sas limbas non natzionales.

Su progetu de su Babel Film Festival naschet non solu dae s’intentu de tènnere i n contu unu tzìnema chi contat semper de prus istòrias perifèricas, in ue s’impreu de sa limba de periferia tenet caràteres narrativos de importu mannu pro sa resèssida artìstica de s’òpera. Su progetu naschet fintzas dae s’intentzione de torrare a dare una unidade de intentos a àreas linguìsticas diferentes, pro nde mustrare sa richesa e donare una testimonia de cantu sa vida de custas limbas podet arrichire s’autore de tzìnema, influende subra sa creatividade sua e cun cunsighèntzias figurativas tzentrales in sa definitzione de s’òpera.

In custu sensu su Festival donat a totu sos autores, siat de documentàrios siat de fiction, sa possibilidade de dare visibilidade e fortza de espressione a sas limbas, pro favorire unu cunfrontu e iscàmbiu culturale intre sas populatziones de totu su mundu. Su programma de su Babel Film Festival est unu contributu fintzas a su cunfrontu cun sos universos de sa mùsica e de su teatru – chi dae prus tempus cunforme a su tzìnema ant cumprèndidu sa richesa de sas limbas de minoria – ma fintzas de sa televisione, chi est aperèndesi semper de prus a sos disìgios de sas comunidades prus piticas torrendeli su deretu de tènnere boghe.

S’obietivu de su Babel Film Festival est fintzas cussu de èssere unu apuntamentu annuale pro sa tzitade de Casteddu, faghende in manera chi sa capitale de Sardigna siat unu logu de cunfrontu e iscàmbiu e chi custu potzat torrare a paris cun sa vocatzione sua de tzitade in ue sas diversidades si podent atobiare, faeddare e cumprèndere. Est una ocasione de importu pro chi, faghende su tzìnema, e prus in generale faghende arte, atzapat una bena de creatividade in sa diversidade de sas limbas de minoria (siant limbas, dialetos, faeddadas, slang e àteru), in sa fortza figurativa e comunicativa issoro. Cussas limbas espressivas chi, pròpriu ca non sunt riduidas a sa netzessidade de una comunicatzione funtzionale e funtzionalìstica, dant una visione prus poètica de su mundu, prus a canta a sa vida de sas comunidades, in ue sa vida fitiana est dìnnia de èssere bìvia.

Partetzipatzione

Sa partetzipatzione a su cuncursu est de badas e aberta a totus, sena làcanas de edade e de natzionalidade. Onni autore podet imbiare prus de un'òpera pro onni setzione, cumpilende pro onni una un’ischeda de iscritzione seberada.

Pro pòdere partetzipare a manera giusta tocat a cumpilare su mòdulu liberatòria chi at a èssere retzidu cun sa posta eletrònica a cunfirma de àere imbiadu su form on line.

Iscrizione

Per partecipare al concorso compilare il form sottostante.

Dati Anagrafici
Datos de su Film
Concept del Film
Sinossi del Film
Cast & Credits
Produzione
Distribuzione
Upload Fotografias (formadu jpg)

Il peso totale dei file allegati non deve superare 10MB.

Ai sensi del D. Lg. 196/03 sulla tutela dei dati personali, con l'invio del presente modulo autorizzo l'organizzazione del Babel Film Festival a trattare i dati inviati per le sole finalità legate all'esecuzione delle richieste.

Contatti

BABEL FILM FESTIVAL
c/o Centro servizi culturali Società Umanitaria
Viale Trieste 118, 126 – Cagliari
e-mail: cinetecasarda@gmail.com
Segreteria: tel. 070 278630, e-mail: info@babelfilmfestival.com
Tore Cubeddu, tel. 3932409546
Ufficio stampa: stampa@babelfilmfestival.com